Deputeti i Partisë Demokratike të Kosovës (PDK), Memli Krasniqi në seancën e 24 nëntorit në Kuvendin e Kosovës ka thënë se në javët e fundit është bërë shumë zhurmë që nuk është dashur të bëhet fare pasi sipas tij Kosova nuk ka pasur nevojë të vijë në një situatë të tillë.
“E mirëpresim marrëveshjen e cila shmang përshkallëzimin e situatës në veri të vendit” gjersa ka shtuar se është bërë shumë zhurmë, “por jo shumë zhurmë për asgjë” sepse siç thotë ai është bërë shumë.
Sipas tij, çështja e targave që ishte kompetencë e kryeministrit, “u shndërrua në çështje të negocimit” duke e bërë palë Serbinë dhe Aleksandër Vuçiqin.
“Ishte kompetencë ekskluzive e Qeverisë dhe Kryeministrit, u shndërrua në temë të diskutimit të negocimit duke e bërë palë Serbinë dhe Aleksandër Vuçiqin, për një çështje e cila ishte kompetencë vendimmarrëse e kryeministrit dhe e qeverisë, ka mundur të bëhet duke u dakorduar me ShBA dhe duke e marrë bazë këshillën që ishte në tryezë qe sa kohë, në tavolinë e në takime, e në telefonata”, ka deklaruar Krasniqi.
Ai ka kërkuar përgjigje nga Qeveria se “A do të kthehen serbët në institucionet e Kosovës”.
“A do të kthehen serbët në institucionet e Kosovës, askush nga ju nuk po tregon se a do të ketë normalitet në veri, por a do të kthehen një pjesë e tyre, nuk po e thuani as ju, as pala tjetër”, ka vijuar ai.
Sipas tij, këtë kohë, Qeveria e Kosovës do duhej të fokusohej në tema që ndikojnë në jetën e qytetarëve e jo të shkaktojë frikë dhe panikë në veri me situatat e fundit.
“Fatkeqësisht kryeministër, duke mos bërë një gjë të tillë, duke hyrë në një proces që u dorëzove, më vjen keq që ke shprehur një pafuqi të Kosovës, duke mos qenë e mundshme të zbatohet vendimi për tabelat, duke krijuar shpenzime për mbajtjen e zgjedhjeve që kanë mundur të evitohen, duke ndjellur frikë e panik sidomos në veri”.
Ndërkaq për propozimin franko-gjerman, ai ka thënë se duhet të vazhdojë angazhimi në negocimin e tij dhe të ketë në fokus marrëveshjen finale me njohjen reciproke.