Kryetari i Partisë Demokratike të Kosovës(PDK), Memli Krasniqi për menaxhimin e krizës ekonomike ka propozuar pesë masa.

Ai këto masa i ka listuar në llogarinë e tij në Facebook.

“Për ta përballuar më lehtë krizën e rëndë ekonomike që ka kapluar çdo familje në gjithë vendin, unë kam propozuar pesë masa konkrete, me qëllim lehtësimin e jetës së qytetarëve në këtë periudhë sfiduese”, ka shkruar Krasniqi.

I pari i PDK-së në masën e tij të parë ka propozuar që të lirohen nga TVSh-ja të gjitha mallrat esenciale të konsumit për një periudhë gjashtë-mujore.

May be an image of 1 person and text that says

Ndërsa si propozim të dytë ai ka thënë që të lirohen nga akciza produktet e naftës për një periudhë gjashtë-mujore, gjë e cila sipas tij do të ulë çmimin e naftës për 36 centë në litër.

Në propozimin e tij të tretë thuhet se duhet të lirohet nga TVSH-ja konsumi i energjisë elektrike për një periudhë gjashtë-mujore dhe të subvencionohen me 25 për qind faturat e atyre që konsumojnë deri në 1200 KWH.

Po ashtu ai ka propozuar të rriten pagat, pensionet dhe ndihmat sociale për të paktën aq sa është norma mesatare e inflacionit (rreth 15 për qind).

Ndërsa si masë të fundit, Krasniqi ka propozuar që të lejohet tërheqja deri në 30 për qind e kursimeve pensionale dhe të rimbursohet gradualisht shuma e tërhequr për kontribuuesit që kanë më pak se 10 mijë euro në llogaritë e Trusti-t.

Nuk është hera e parë që opozita është duke dhënë propozime për menaxhimin e krizës ekonomike.

Memli Krasniqi në fjalimet e tij në Kuvend e ka kritikuar Qeverinë e Kosovës, se nuk po ndërmerrë masa për trendin e rritjes së çmimeve, sidomos për produktet esenciale dhe naftës.

Krasniqi, po ashtu e ka kritikuar pozitën, për iniciativën e një rezolute për rritjen e çmimeve.

Ai ka thënë se Qeveria nuk duhet të presë rezoluta nga Kuvendi i Kosovës, sepse siç thotë ai, ajo i ka të gjitha mekanizmat veprues.

Krasniqi për krizën ekonomike: Qeveria duke e injoruar problemin vetëm po e thellon atë