Kryetari i Partisë Demokratike të Kosovës (PDK), Memli Krasniqi ka kritikuar qeverinë e Kosovës për faturat e larta të energjisë elektrike duke thënë se këto çmime kanë tmerruar çdo familje në Kosovë.
Ai në seancën e së enjtes në Kuvendin e Kosovës ka thënë se subvenciomi i qeverisë ka qenë si një lloj transferi që përmes qytetarëve të rriten të hyrat e KEDS-it dhe KESCO-s.
“Në mënyrë jo normale, faturat e muajit të kaluar kanë tmerruar secilën familje në Kosovë, sot dëgjojmë përfaqësuesit e qverisë duke treguar një realitet tjetër. Subvencionimin e keni pasë transfer, u keni dhënë para atyre përmes qytetarëve, u keni dhënë nga 100 euro pensionistëve, fëmijëve, studentëve u keni marrë pas dy dite përmes faturave të rrymës. Qytetarët i keni përdorë si urë lidhëse”, ka thënë Krasniqi.
Sipas tij, mbështetja e qeverisë karshi bllok-tarifës është banalitet dhe cilësohet pabarazi sociale.
“Me dalë me mbrojtë bllok-tarifën kinse ësthë drejtësi sociale është banalitet, është më mirë të dilni e të thoni kemi qëndrim ideologjik. Por bllok-tarifa është pabarazi sociale sepse nuk ka mundësi të barabarta, një qeveri normale duhet të punojë të krijojë mundësi të barabarta. Është pabarazi sociale që e keni instaluar ju, po flasim për produkt esencial, nuk jetohet pa energji, sikur ushqimet është, me logjikën e juaj ju duhet të na bëni edhe racionimin e ushqimeve”, ka vijuar ai.
Ai ka kritikuar qeverinë edhe për fshehje të hetimit për rezervat shtetërore duke thënë se kjo skemë është kriminale e korruptive që në krye e ka
Martin Berishajn.
“E keni fshehur hetimin parlamentar për rezervat shtetërore, është krim i organizuar, në krye me Martin Berishajn. Kjo nuk bëhet pa dijeninë e kryeministrit. Shumica dërrmuese as nuk e dinë as nuk besojnë që është, faktet i keni para syve, vetëm hi mos u hedhni në sy të qytetarëve”.