Kryetari i Partisë Demokratike të Kosovës (PDK), Memli Krasniqi, e ka cilësuar si të drejtë vendimin e Gjykatës së Apelit, e cila ka marrë vendim se tarifat e reja të vendosura nga Zyra e Rregullatorit për Energji (ZRRE), ishin të paligjshme.
Krasniqi ka thënë se Qeveria e Kosovës bashkë me ZRRE-në qëllimshëm kanë tentuar ta rrisin çmimin e energjisë për qytetarët e Kosovës.
Ai ka theksuar se partia që ai përfaqëson vazhdimisht ka qenë kundër këtij vendimi.
“Një institucion që duhej të ishte i pavarur ishte vënë në zbatim të projeksioneve të pushtetit duke injoruar interesin qytetar. PDK në mënyrë konsistente ka qenë kundër këtij vendimi sepse ka qenë vendim i padrejtë, sepse nevojat për import të energjisë kanë qenë jashtëzakonisht të vogla, dhe kostoja për ta paguar nuk ka ekzistuar fare, sepse janë mbuluar nga prodhimi vendor”, ka deklaruar ai.
“Jemi të bindur se e drejta është në të drejtë të qytetarëve, ne jemi gëzuar vendimit të gjykatës. Kemi pritur që të ketë reflektim nga Qeveria, por ajo e ka kundërshtuar vendimin e Gjykatës përmes ZRRE-së”, ka vijuar ai.
Kryetari i PDK-së është shprehur se shpreson që qytetarëve të cilët kanë paguar energji me çmim të ngritur t’u kthehen mjetet nga Qeveria e Kosovës.
“Tashmë ne e kemi një masë të përkohshme që i anulon vendimet e ZRRE-së. Jam i bindur se kemi pasur të drejtë. Në momentin kur do të ketë një vendim mbi meritën, është obligim i Qeverisë që t’i rimbursojë qytetarët të cilët kanë paguar rrymën me tarifat e reja”, ka thënë ai.
Në fund, ai u ka uruar shërim të lënduarve nga Kosova, të cilët kanë pësuar aksident në Austri.