Ministri i Administrimit të Pushtetit Lokal (MAPL), Elbert Krasniqi në margjinat e konferencës “Muni World 2022” që po mbahet në Izrael është takuar me ministrin e bashkëpunimit Regjional, Esawi Frej.
Ministri Krasniqi ka thënë se ka pasur diskutime të frytshme dhe përmbajtësore me të, kështu duke u zotuar për bashkëpunim në mes të dy vendeve.
“Kënaqësi të takoj mikun tim Ministrin e Bashkëpunimit Regjional, Esawi Frej. Diskutime të frytshme dhe përmbajtësore lidhur me thellimin e bashkëpunimit në mes të dy vendeve tona”, ka shkruar Krasniqi në Facebook.
Ndër të tjera ai ka bërë të ditur se do të zhvillojë takime me qëllim të përafërimit të Komunave të Kosovës me Komunat e Izraelit duke synuar shkëmbimin e përvojave për zhvillimin ekonomik lokal, inovacionin dhe ofrimin e shërbimeve kualitative për qytetarët.
Tutje ai ka thënë se në këtë konferencë po qëndron me ftesë të Kryetarit të Qytetit të Jerusalemit, Moshe Lion dhe Kryetarit të Federates së Autoriteteve Lokale në Izrael, Haim Bibas.