Gjykata Speciale ka marrë vendim që t’ua vazhdojë masën e paraburgimit edhe për dy muaj ish-kryeparlamentarit Jakup Krasniqi dhe ish-deputetit Rexhep Selimi.
Masa e paraburgimit iu vazhdua nën arsyetimin se ekziston rreziku i ndikimit në dëshmitarë dhe rreziku i dëmtimit të provave.
“Në dritën e zhvillimeve të mësipërme, si dhe faktin se ka rrezik të vazhdueshëm në pengimin e procedimit dhe kryerjes së krimeve të mëtejshme…paneli konstaton se paraburgimi i z. Selimi edhe për dy muaj të tjerë është i nevojshëm dhe i arsyeshëm në rrethanat specifike të rastit… Në dritën e këtyre faktorëve, Paneli konstaton se paraburgimi i z. Krasniqi për dy muaj të tjerë është i nevojshëm dhe i arsyeshëm në rrethanat specifike të rastit”, thuhet në vendimet e Krasniqit e Selimit, ku theksohet se do të kërkojnë që gjykimi të zhvillohet sa më shpejt që të jetë e mundur.