Kreu i Dumës shtetërore ruse, Vyacheslav Volodin, ka deklaruar se premtimi nga Perëndimi që t’i ofrojë armë shtesë Kievit mund të çoj në një nivel të ri luftën në Ukrainë, i cili mund të rezultojë në një katastrofë globale.
Volodin ka paralajmëruar se mbështetja e Shteteve të Bashkuara dhe NATO-s për Ukrainën po e çon botën në një luftë të tmerrshme, shkruan Reuters.
“Nëse Uashingtoni dhe shtetet e NATO-s furnizojnë me armë, që mund të përdoren për të goditur qytetet civile dhe për përpjekjet për të marrë nën kontroll territoret tona, kjo do të çojë në ndërmarrjen e masës hakmarrëse, duke përdorur armët më të fuqishme”, ka shkruar ai në Telegram.
Këto deklaratat vijnë pasi javën e kaluar, aleatët perëndimorë u mblodhën në Gjermani për të koordinuar ndihmën ushtarake shtesë për Ukrainën.
Volodin ka shtuar se Uashingtoni dhe Brukseli e kanë përgjegjësinë që të mos e përshkallëzojnë luftën në Ukrainë, raporton euronews.