Grupi paraushtarak rus Wagner mohoi të premten se po rekrutonte serbë për të luftuar në Ukrainë, një ditë pasi aktivistët ngritën ankesa penale kundër organizatës në Beograd.
Midis atyre të përmendur në ankesa ishin ambasadori i Rusisë në Serbi, Alexander Botsan-Kharchenko dhe Aleksandar Vulin, kreu i Agjencisë së Sigurisë dhe Informacionit shtetëror të Serbisë.
“Unë nuk rekrutoj serbë,” tha themeluesi i Wagner, Yevgeny Prigozhin në një deklaratë, duke thënë se ai kurrë nuk kishte dëgjuar për Bocan-Harchenkon apo Vulinin, shkruan Reuters.
Në fillim të kësaj jave, presidenti serb Aleksandar Vuçiq tha se Rusia duhet të ndalojë përpjekjet e saj për të rekrutuar serbët për të luftuar përkrah forcave Wagner. Ai tha se faqet e internetit ruse dhe grupet e mediave sociale po publikonin reklama në gjuhën serbe në të cilat grupi Wagner bënte thirrje për vullnetarë.
Shtetet e Bashkuara thanë të premten se po vendosin sanksione të reja ndaj Grupit Wagner, duke e akuzuar atë për dërgimin e armëve të Koresë së Veriut në Rusi për t’u përdorur në konfliktin e Ukrainës, gjë që Wagner e mohon, dhe se ka rekrutuar të burgosur rusë për të luftuar.