Ashtu siç u dakorduan, në orën 9:00 të kësaj së hëne u takuan te objekti i Komunës së Prishtinës.
Dhjetëra punëtorë të “Trafikut Urban” dhe të operatorëve privatë u bashkuan për të protestuar për të njëjtin qëllim, mosekzekutimi i pagave nga Komuna.
E derisa autobusët nuk ishin në funksion për qytetarët, dikush u kërkoi falje atyre. .
“Kemi borxhe, dy rroga punëtorët e Trafikut Urban nuk kanë mundur t’i marrin akoma. Ju kërkojmë ndjesë për gjendjen në të cilën jemi sot”, ka thënë Ilmi Gashi, kryetar i Sindikatës së Trafikut Urban.
Edhe Izet Smajli nga Shoqata e transportuesve privat bëri thirrje që kjo situatë të zgjidhet sa më shpejt.
“Pa paga nuk punon as punëtori, e as autobusi nuk ecën pa naftë”, ka thënë Izet Smajli, Shoqata e transportuesve privat.
Por ankesat e tyre nuk mbetën të padëgjuara. Për t’i ballafaquar ato para masës doli kryetari i Komunës së Prishtinës, i cili edhe njëherë e përsëriti emrin e fajtorit sipas tij.
“Problemi nuk është këtu te Komuna, por atje te Qeveria e te Ministria e Financave”, ka thënë Përparim Rama, kryetar i Komunës së Prishtinës.
E meqë problemin po e adresonte te Qeveria, protestuesit i kërkuan Ramës që t’i bashkohej protestës.
Gashi: “Hajde me ne.”
Rama: “Unë me ju deri në fund.”
Kështu rrjedha e protestës ndryshoi; tashmë protestuesit, bashkë me Ramën, u nisën në drejtim të objektit të Qeverisë.
Nga këtu ata po kërkonin takim të përbashkët mes përfaqësuesve të tyre, Komunës dhe Ministrisë.
Për këtë Rama ishte i gatshëm, por jo edhe qeveritarët, të cilët kërkuan takim me protestuesit pa praninë e zyrtarëve të Komunës.
Takimi mes tyre zgjati më shumë se një orë, por nuk solli asnjë rezultat.
Ministria e Financave, në detyrë, sërish fajin e adresonte te Komuna, për çka përfaqësuesit u zhvendosën edhe një herë në Komunë për takim me kryetarin.
Të paktën kështu u deklarua Ilmi Gashi, kryetar i Sindikatës së Trafikut Urban, pas takimit:
“U munduan me na e trullos kokën. S’ka rezultat, vazhdon protesta”, ka thënë Ilmi Gashi, Kryetar i Sindikatës së Trafikut Urban.
Pas kësaj dite plot takime mes palëve dhe institucioneve, Komuna e Prishtinës ka thirrur seancë të jashtëzakonshme më 27 nëntor në orën 15:00, me dy pika të rendit të ditës, në mesin e të cilave është edhe propozim-vendimi për bartjen e mjeteve nga viti 2024 në vitin 2025.
Në ndërkohë, përfaqësuesit e Lëvizjes Vetëvendosje në Komunën e Prishtinës krejt këtë situatë e quajtën propagandë të LDK-së.