Kryeminstri i Greqisë, Kyriakos Mitsotakis, ka falënderuar Shqipërinë për dërgimin e zjarrfikësve dhe automjeteve në përballjen ndaj zjarreve.

Me anë të një postimi në Facebook, Mitsotakis ka shprehur falënderimet e tij ndaj Shqipërisë.

“Falënderimet tona shkojnë për Shqipërinë që dërgoi në Greqi 48 zjarrfikës dhe 9 automjete për t’u bashkuar me ne për t’i luftuar zjarret në Aleksandropoli. Faleminderit Shqipëri”, ka  shkruar ai.

Our thanks go out to Albania, for sending to Greece 48 firefighters and 9 vehicles to join us as we fight the wildfires in Alexandroupoli. Thank you, Albania. 🇦🇱🇬🇷@ediramaal

— Prime Minister GR (@PrimeministerGR) August 23, 2023

Ndryshe, tetëmbëdhjetë trupa janë gjetur në një zonë pyjore të Greqisë veriore të goditur nga zjarret gjatë katër ditëve të fundit, ka bërë të ditur shërbimi grek i zjarrfikësve.

Raportet e para sugjerojnë se ata që kanë vdekur mund të kenë qenë emigrantë. Një mjek dhe grup hetimor po shkojnë në vendngjarje në pyllin e Dadias.

Rajoni i Evros në Greqinë verilindore, jo shumë larg kufirit turk, është shkatërruar nga zjarret.

Pacientët u zhvendosën nga një spital pasi zjarret arritën në Aleksandropolis, raporton BBC.

Flakët arritën në mjediset e spitalit universitar të qytetit dhe foshnjat e porsalindura e po ashtu pacientët e kujdesit intensiv ishin midis atyre që u evakuuan në një traget të ankoruar në portin e qytetit.

Një vdekje e mëparshme, gjithashtu, besohet të ketë qenë një emigrant, ishte raportuar në një fshat afër Aleksandropolisit dhe shërbimet e urgjencës kishin dërguar mesazhe me tekst celular në zonat përreth, duke u kërkuar njerëzve të largoheshin.

Parku kombëtar Dadia është një zonë e madhe pyjore në veri të Aleksandoupolis dhe zjarret mendohet se janë përhapur me shpejtësi atje që nga e hëna.

Zëdhënësi i shërbimit zjarrfikës, Yiannis Artopoios, tha se po hetohet mundësia që 18 viktimat e gjetura të martën të kishin hyrë ilegalisht në Greqi, duke qenë se nuk kishte raportime për banorë të zhdukur.

Rajoni i Evros është bërë një nga rrugët më të njohura për emigrantët sirianë dhe aziatikë që kalojnë lumin Evros nga Turqia për në Bashkimin Evropian.