Kryeministri Albin Kurti, ka thënë se mosfaturimin e veriut të Kosovës kjo qeveri e ka trashëguar nga e kaluara.
Ai është shprehur se pagesa për energjinë e shpenzuar nga veriu i Kosovës, është vetëm borxh ndaj shtetit.
Kurti bëri të ditur se janë pranë një marrëveshjeje për këtë çështje. Sipas tij, pagesa e energjisë për veriun e vendit tash për tash është e domosdoshme.
“Ne e kemi trashëguar një gjendje të rëndë, ku nuk pasur faturim për energjinë në veri. Nuk ka alternativë dhe çdo cent i dhënë për veriun do të regjistrohet si borxh. Ne nuk jemi duke u falur paratë. Jemi duke e shpëtuar situatën. Është aspekti humanitar. Nuk dëshirojmë një rajon të tërë ta shkëputim nga energjia, nuk dëshirojmë të krijojmë pretekst për Serbinë të zgjerohet në Kosovë për kinse humanitetin e tyre”, ka thënë ai.
Tutje, Kurti ka folur edhe për Asociacionin e Komunave Serbe, duke thënë se nuk është fare temë e diskutimit.
Sipas tij, në qendër të dialogimit me Serbinë është njohja reciproke dhe jo Asocicacioni i Komunave me shumicë serbe.
Ndërkaq, për aplikimin në Këshillin e Evropës, ai ka thënë se është optimist se do të ketë sukses.