Në kuadër të vizitës zyrtare në SHBA, kryeprokurori i Prokurorisë Speciale Blerim Isufaj dhe prokurori special Naim Abazi janë pritur në takime pune nga anëtarë të Kongresit Amerikan, përkatësisht nga Pat Fallon, Zach Nunn, Robert Aderholt dhe John Moolenaar.
Gjatë këtyre takimeve, Isufaj dhe Abazi kanë riafirmuar përkushtimin institucional të Republikës së Kosovës në luftën kundër krimit të organizuar dhe terrorizmit, njofton Dukagjini.
Gjatë takimeve është diskutuar për sundimin e ligjit në Kosovë, rëndësinë e bashkëpunimit ndërkombëtar, si dhe në ngritjen e kapaciteteve.
Kongresistët amerikanë shprehën mbështetjen e vazhdueshme të Shteteve të Bashkuara të Amerikës për forcimin e sundimit të ligjit në Kosovë, duke theksuar rëndësinë e pavarësisë së institucioneve të drejtësisë dhe përkrahjen konkrete në përpjekjet për luftimin e krimit të organizuar dhe korrupsionit.