Nënkryetari i Kuvendit nga radhët e Partisë Demokratike të Kosovës(PDK), Enver Hoxhaj, pas mbledhjes së kryesisë së Kuvendit, ka bërë të ditur se të enjten e 29 shtatorit do të mbahet seanca e re plenare.

Ai është shprehur se seanca e re do t’i ketë disa pika të reja të rendit të ditës, ndërsa do të diskutohet edhe për pikat e papërfunduara nga seancat e kaluara.

Ndërsa, interpelanca e ministrit Hekuran Murati është shtyrë për mbledhje tjetër.

Sa i përket grevave, Hoxhaj ka thënë se në mes të Qeverisë dhe sindikalistëve duhet të gjendet një zgjidhje që është e përkohshme apo afatshkurtër, deri në janar kur hyn në fuqi ligji i pagave.

“Qëllimi është që fëmijët të kthehen në shkollë dhe të plotësohen kërkesat minimale të sindikalistëve”, ka thënë Hoxhaj.

Ndër të tjera, ai shtoi se qëllimi i PDK-së nuk është që të luajë rolin e zëdhënësit të kësaj sindikate.