Bordi i Asociacionit të Komunave të Kosovës, ka reaguar ndaj deklaratave të Kryeministrit të Kosovës Albin Kurti, i cili i akuzoi për politikë anti-shtetërore dhe ku në mes tjerash ka thënë që “bojkoti që të mos dorëzohen listat e mësimdhënësve që po mbajnë grevën, s’është thjesht politikë anti-qeveritare, por është politike anti-shtetërore”.
Ata kanë deklaruar se me gjithë kontributin që kanë kryetarët e komunave në Kosovë, është fyrje t’i cilësosh që janë kundër shtetit të Kosovës.
Po ashtu, kryetarët e komunave presin një kërkim falje nga kryeministri Kurti, pasi sipas tyre ai e ka obligim moral dhe institucional.
Ndërsa, ata e kanë paralajmëruar Kurtin që të mos nxisë edhe situata tjera për të cilat ata nuk kanë asnjë përgjegjësi.
“Kjo qasje për ne nuk është qasje që i duhet vendit tonë as momentumit, aq më tepër qasje që polarizon panevojshëm shoqërinë tonë”, thuhet në reagimin e tyre.
Gjithashtu, ata kanë rikujtuar që punëdhënës i punëtorëve komunal është Komuna dhe jo Qeveria, kurse Ministria e Financave vetëm proceson pagesat sepse vendimmarrës për buxhetet komunale janë vetë komunat.
“Si mund të bëjnë politikë anti-shtetërore Kryetarët e Komunave ku secili nga ata ka një veprimtari të begatë në shërbim të atdheut dhe kombit me dekada të tëra e që shumë nga ata edhe luftëtar lirie si dhe familjar dëshmorësh që kanë derdhur gjakun për shtetin e Kosovës”, thuhet në reagimin e kryetarëve të komunave.
Në reagimin e tyre thuhet se Kryetarët e Komunave kanë sakrifikuar shumë për shtetin, duke mos kursyer asgjë, dhe sipas tyre nuk ka asnjë logjikë që një njeri që ka luftuar për vendin e vetë të punojë kundër shtetit.
“Kryetarët e Komunave vetëm po kërkojnë ligjshmëri dhe funksionim të ndarë mes niveleve të qeverisjes në Kosovës në harmoni me Kushtetutën”, thuhet më tej në reagimin e tyre.