Kryetarët e komunave në Kosovë kanë kërkuar takim me kryeministrin Albin Kurti dhe kabinetin qeveritar.
Në kërkesën e tyre, të cilën e ka bërë publike Asociacioni i Komunave të Kosovës në rrjetin social Facebook, thuhet se ky takim është kërkuar për t’i trajtuar temat, shqetësimet, nevojat dhe kërkesat e komunave të Kosovës.
“Temat e propozuara në takimin tonë të përbashkët do të mund të ishin: 1. Tatimi në pronë – Ligji i ri për tatimin në pronë, si dhe mundësia e faljes së 100 euro përmes ligjit; 2. Procedurat e rekrutimit në shërbimin publik; 3. Të hyrat vetanake dhe buxheti për Komunat; 4. Pronat e administruara nga Agjencia Kosovare e Privatizimit dhe nga Agjencia e Pyjeve e që mund të jenë në interes të komunave; 5. Granti i Katërt për Komunat, procedimin e Ligjit për financa lokale”, thuhet në kërkesën e tyre.
Këtë kërkesë, në emër të Bordit të Asociacionit të Komunave të Kosovës, kryetari i AKK-së Agim Aliu, ia ka drejtuar kryeministrit Kurti, ku ka kërkuar takim të Qeverisë së Kosovës me kryetarët e komunave.