Kryetari i Gjykatës Komerciale, Mahir Tutuli, ka deklaruar se numri i gjyqtarëve në këtë gjykatë është jashtëzakonisht i vogël, ai ka bërë të ditur se deri më tani janë vetëm 11 sosh.
Sipas tij, një gjyqtarë do t’i pranojë mbi një mijë lëndë.
“Gjyqtarët do të pranojnë mbi një mijë lëndë për një gjyqtarë është situatë e palakmueshme, përderisa në departamentet ekonomike ekzistuese gjyqtarët në gjykatat e shkallës së parë kanë pasë 200 deri 300 kurse në gjykatën e epalit jo më shumë se 100 lëndë”, ka deklaruar Tutuli.
Ai potencoi se gjendja është më e rënduar se më herët duke thënë se nëse mbesin me këtë numër të gjyqtarëve situata do të vazhdojë të përkeqësohet.
Ai ka bërë të ditur se qëllimi i Gjykatës Komerciale është që të shkurtohen procedurat gjyqësore, në mënyrë që bizneset t’i kryejnë më shpejtë kontestet apo problemet e tyre.
“Gjykata është konceptu e cila do ta shkurtojë procedurën e afateve gjyqësore, madje zgjerimi i kompetencave që lëndët që është dashtë të gjykohen në disa gjykata, të gjitha këto të gjykohen brenda një gjykate, qëllimi ka qenë që të shkurtohet sa më shumë procedura gjyqësore, që bizneset t’i zgjidhin problemet në një afat të arsyeshëm”, ka deklaruar ai.
Ai ka bërë të ditur se Gjykata Komerciale nuk i ka kushtet minimale për të vepruar, sipas tij nuk ka as salla të gjykimit
Për të funksionuar si duhet, sipas kryetarit të Gjykatës Komerciale, numri i të punësuarve duhet të jetë 90, dukë përfshirë minimalisht 20 gjyqtarë.
Por sipas tij për shkak të kufizimeve buxhetore është vendosur që të jenë vetëm 15 gjyqtarë.