Kryetari i bashkisë së Kievit, Vitali Klitschko, ka paralajmëruar banorët e kryeqytetit ukrainas se duhet të përgatiten për situatat më të vështira, të cilat mund të vijojnë gjatë këtij dimri nëse Rusia vazhdon të godasë infrastrukturën energjetike të vendit.
“Ne po bëjmë gjithçka për ta shmangur këtë. Por le të jemi të sinqertë, armiqtë tanë po bëjnë gjithçka që qyteti të jetë pa ngrohje, pa energji elektrike, pa ujë, në përgjithësi, kështu që të gjithë vdesim. Dhe e ardhmja e vendit dhe e ardhmja e secilit prej nesh, varet nga sa të përgatitur jemi për situata të ndryshme”, ka thënë Klitschko për mediat shtetërore ukrainase.
Ndërsa, presidenti ukrainas, Volodymyr Zelensky, të dielën e gjashtë nëntorit, ka thënë se rreth 4.5 milionë njerëz ishin pa energji elektrike. Ai u bëri thirrje ukrainasve që të durojnë vështirësitë, duke thënë se “ne duhet ta kalojmë këtë dimër dhe të jemi edhe më të fortë në pranverë se tani”, raporton euronews.
Gjatë muajit të fundit, shteti rus është fokusuar në goditjen e infrastrukturës energjetike të Ukrainës. Sulme të tilla kanë shkaktuar mungesa të energjisë dhe ndërprerje të qarkullimit në të gjithë vendin.
Operatori shtetëror i energjisë i Ukrainës, Ukrenergo, ka thënë se ndërprerje të vazhdueshme ishin planifikuar dhe në rajonet Chernihiv, Cherkasy, Zhytomyr, Sumy, Kharkiv dhe Poltava.
Kryeqyteti i Ukrainës, Kievi, planifikon të vendosë rreth një mijë pika ngrohjeje, por është e paqartë nëse kjo do të mjaftonte për një qytet me tre milionë banorë.