Gjendja pas reshjeve të mëdha të shiut, në komunën e Klinës, është ende e rënduar.
Kryetari i kësaj komune, Zenun Elezaj, për Portalin Dukagjini tha se kanë punuar tërë natën për ta menaxhuar situatën, e cila sipas tij është mjaft e rëndë.
Elezaj tha se shumë qytetarë i kanë evakuuar nga zonat e rrezikuara dhe, po ashtu, disa janë evakuuar vetë pa ndihmën e autoriteteve komunale apo qendrore.
Gjendja sipas tij mbetet kritike në qytet e edhe në fshatra të Klinës.
“Gjendja është e rënduar në qytet dhe në fshatra. Ka pasur gjatë tërë natës reshje. Jemi duke punu ende, kemi punu tërë natën. Disa qytetarë janë evakuuar vetë, disa kanë pasur nevojë për ndihmën tonë”, ka thënë ai.
Në njoftimin e mbrëmshëm të Qeverisë së Kosovës thuhej se në krahasim me komunat e tjera, komuna e Klinës mbetet me situatën më të rënduar nga vërshimet.