Kreshnik Radoniqi, kryetar i Komisionit Qendror të Zgjedhor (KQZ), pas votimit të tij në Pejë, është prononcuar për media, duke bërë thirrje që qytetarët të dalin në votime dhe të respektojnë rregullat e procesit zgjedhor.
“Bëj apel që të respektohen rregullat dhe ligji i KQZ-së dhe rendi. Dua të ftoj edhe anëtarët e vendvotimeve që të respektojnë rregullat, në mënyrë që gjithë procesi të shkojë pa asnjë problem. Uroj që të kemi një ditë të mirë dhe të qetë,” tha Radoniqi.
Ai foli edhe për votimin me asistencë, duke theksuar se KQZ-ja ka ndërmarrë të gjitha hapat e nevojshëm dhe ka përgatitur manuale e trajnime për anëtarët e këshillave të vendvotimeve.
“Sa i përket votimit me asistencë, KQZ-ja ka ndërmarrë të gjitha hapat dhe procedurat përkatëse, dhe gjithçka është theksuar në manualet dhe trajnimet tona. Se çfarë ndodh në realitet ditën e zgjedhjeve nëpër vendvotime, mbetet në administrimin e KQZ-së dhe të vet këshillave të vendvotimeve,” u shpreh ai.
Radoniqi shtoi se në disa vendvotime në raundin e parë, votimi me asistencë ka qenë i theksuar dhe shpesh i pajustifikuar.
“Ne e kemi bërë të qartë se në disa vende votimi me asistencë ka qenë shumë i theksuar dhe në disa raste arsyetimet nuk kanë qenë të duhura në librat e votimit. Për këtë arsye kemi ngritur shqetësimin dhe shpresojmë që tash, sot, këshillat e vendvotimeve do të kenë më shumë kujdes. Jo secili ka të drejtë të votojë me asistencë, por vetëm personat në nevojë. Shpresojmë që kjo çështje të respektohet,” tha Radoniqi.
Sa i përket votave me postë, kryetari i KQZ-së theksoi se ato pritet të arrijnë fizikisht në Kosovë gjatë javës së ardhshme.
“Varësisht prej cilit shtet nisen, por ne do t’i marrim ato të hënën. Rreth 28 mijë votues kanë aplikuar, por ende nuk e dimë sa vota janë dorëzuar, pasi ato nuk janë tërhequr ende,” deklaroi Radoniqi.