Kryetari i Zubin Potokut, Izmir Zeqiri, ka bërë të ditur se ende nuk ka hyrë brenda objektit të komunës.
Zeqiri në një prononcim për Albanian Post, ka thënë se është duke pritur të krijohen kushtet për ta bërë një gjë të tillë.
“Akoma nuk jam vendosur në zyrë, në komunë, afër komunës jemi këtu në oborr”, ka thënë për Albanian Post, Izmir Zeqiri, kryetari i sapobetuar i Zubin Potokut, përmes telefonit.
“Po presim të vendosemi në komunë, po rrimë afër tash”.
Tutje, ai ka thënë se policia nuk është duke përdorur forcë ndaj protestuesve, teksa ka bërë të ditur se bashkë me të është edhe një përfaqësuese e Ministrisë së Administrimit të Pushtetit Lokal.
Ndryshe, Policia e Kosovës është duke asistuar për t’ua mundësuar kryetarëve të tri komunave veriore, Zubin Potok, Leposaviq dhe Zveçanit, të hyjnë brenda ndërtesave komunale.
Por, në rrugë kanë dalë edhe protestues serbë, të cilët janë përplasur me Policinë. Në vend të ngjarjes është parë gaz lotsjellës dhe po ashtu janë dëgjuar disa të shtëna armësh.
Deri më tani nuk raportohet për ndonjë të lënduar.