Korporata Energjetike e Kosovës (KEK), ka bërë të ditur se i është rekomanduar nga Komiteti Teknik për Energji (KTE), që t’i shfrytëzojë 7 milionë euro, nga subvencioni i bartur i Qeverisë së Kosovës për import të energjisë elektrike për të mbuluar kërkesën vendore për energji.
Në njoftimin e tyre thuhet se KEK-u është duke punuar intensivisht me Ministrinë e Ekonomisë, në “finalizimin e marrëveshjes për jetësimin e rekomandimeve të Komitetit Teknik të Energjisë”.
Po ashtu, në njoftim thuhet se KEK-u është duke vazhduar të pranoj energji elektrike nga Shqipëria, në mënyrë që të evitohen reduktimet.
“Për më tepër, në kohën kur në vendin tonë rritet konsumi, KEK po vazhdon të pranoj një sasi të caktuar të energjisë elektrike nga Korporata Elektro-energjetike Shqiptare (KESH). Kjo sasi po merret nga depozitimi që KEK-u kishte bërë për disa muaj në KESH dhe po vazhdon të depozitoj sa herë që KEK-u ka teprica. E gjithë kjo me qëllim furnizimit të konsumatorëve fundor dhe evitimin e reduktimeve”, thuhet në njoftim.
Sipas, KEK-ut, deri më tani kanë depozituar për Shqipërinë mbi 120.000 Mwh, ndërsa në katër ditët e fundit si pasojë e krizës me energji nga Shqipëria janë pranuar rreth 3,500 Mwh.