Kryeministri i Kosovës, Albin Kurti, ka mbajtur një takim me ambasadorët e akredituar të shteteve të QUINT-it në Kosovë, me qëllim të ofrimit të informacioneve më të fundit mbi dialogun ndërmjet Kosovës dhe Serbisë.
Kryeministri, nëpërmjet një postimi në platformën X, ka theksuar se nëse çështja do të ishte vetëm në dorën e Kosovës, ata do të ishin në gjendje të kishin arritur një marrëveshje dhe të ishin tashmë në fazën e zbatimit të saj.
Ai ka bërë të ditur se Kosova është ende e gatshme për të nënshkruar Marrëveshjen Bazë, Aneksin e Zbatimit dhe draftin e datës 21 tetor.
Megjithatë, kryeministri ka shtuar se Serbia vazhdon të refuzojë.
“Theksova gjithashtu se nëse do të ishte vetëm në dorën e Kosovës, ne do të kishim arritur një marrëveshje dhe tashmë do të ishim në proces të zbatimit të saj. Kosova është ende e gatshme të nënshkruajë Marrëveshjen Bazë, Aneksin e Zbatimit dhe draftin e 21 tetorit. Serbia vazhdon të refuzojë”, ka shkruar kryeministri Kurti.
Po ashtu, ai ka shprehur mirënjohjen e tij për Bashkimin Evropian dhe Shtetet e Bashkuara të Amerikës për përpjekjet e tyre në përpjekjen për të rivendosur dialogun pas sulmit terrorist të 24 shtatorit.
“Fillova duke shprehur mirënjohjen për BE-në dhe SHBA-në, për përpjekjet e tyre për të rikthyer dialogun në rrugën e duhur pas sulmit terrorist të 24 shtatorit”, ka shkruar tutje Kurti.