Kryeministri i Kosovës, Albin Kurti, në 145-vjetorin e Lidhjes së Prizrenit ka thënë se që nga ajo ditë, në etapa të ndryshme historike, shqiptarët janë rikthyer në Prizren, sipas tij, për t’i ripërtërirë lidhjet e tyre politike në mes vete dhe me të tjerët.
“Nga kjo ditë e deri më sot duke ecur nëpër etapa të ndryshme historike të tyre, në vazhdimësi shqiptarët janë kthyer e rikthyer me trup e mendje nga Prizreni, kah Lidhja për t’i ripërtërirë lidhjet e tyre politike në mes vete dhe me të tjerët”, ka thënë Kurti.
Kurti ka thënë tutje se vetëm të bashkuar rreth Lidhjes si mendësi dhe vetëdije politike mund të avancojnë në rrugën për forcimin politik të shteteve tona.
“Vetëm të lidhur bashkë dhe besnikërisht rreth Lidhjes si mendësi dhe vetëdije politike mund të avancojnë në rrugën tonë për forcimin politik të shteteve tona (Kosovë – Shqipëri), bashkë me aleatët tanë strategjikë evropian e amerikanë”, ka shtuar kreu i ekzekutivit.
Në këtë manifestim po marrin pjesë presidentja e Kosovës, Vjosa Osmani, presidenti i Shqipërisë, Bajram Begaj dhe kryetari i Kuvendit të Kosovës, Glauk Konjufca.
Këtë të shtunë mbushen 145 vjet që kur më 10 qershor të vitit 1878 ka filluar organizimi dhe themelimi i Lidhjes Shqiptare të Prizrenit.
Është kjo njëherësh një ndër Lidhjet më të organizuara politike gjithëkombëtare pas Lidhjes dhe themelimit të Kuvendit të Lezhës të marsit të vitit 1444, nën organizimin e Gjergj Kastriotit-Skënderbeut dhe udhëheqësve të principatave, përkatësisht të princave shqiptarë në shekullin e 15-të.
Lidhja Shqiptare e Prizrenit në historinë e popullit shqiptar të kohës së re, historikisht është tubimi më i rëndësishëm kombëtar shqiptar.