Kryeministri i Kosovës, Albin Kurti në mbrëmjen e së mërkurës ka zhvilluar një bisedë telefonike me këshilltarin e lartë të Departamentit amerikan të Shtetit, Derek Chollet.
Kështu ka bërë të ditur Zyra e Kryeministrit përmes një komunikate.
Në këtë bisedë telefonike ata diskutuan për zhvillimet e fundit në dialogun Kosovë – Serbi, ku u kërkua që të ketë zbatim të plotë dhe të pakushtëzuar të Marrëveshjes së Brukselit.
Po ashtu, u diskutua edhe për situatën në katër komunat veriore dhe finalizimin e procesit zgjedhor me rastin e mbajtjes së seancave konstituive.
“Ata biseduan edhe për procesin e dialogut ndërmjet Kosovës dhe Serbisë, me theks te zbatimi i plotë dhe i pakushtëzuar i Marrëveshjes Bazike, dhe për takimin e së hënës në Bruksel në nivel të kryenegociatorëve. Folën edhe për situatën në katër komunat në veri të Kosovës pas zgjedhjeve të 23 prillit dhe për finalizimin e procesit zgjedhor me rastin e mbajtjes së seancave konstitutive dhe betimit të kryetarëve të zgjedhur. Institucionet e Republikës së Kosovës mbesin të përkushtuara që të garantojnë kushtetutshmërinë dhe ligjshmërinë, dhe në të njëjtën kohë të sigurojnë mbarëvajtjen e shërbimeve ndaj qytetarëve”, thuhet në njoftimin e ZKM-së.
Tutje, thuhet se Kurti me këshilltarin amerikan e filluan bisedën me vizitën e suksesshme në Kosovë të administratores së USAID-it, Samantha Power, me të cilën shpallën ankandin e parë për parkun me energji solare me kapacitet prej 100 MW.
“Bisedën e filluan me vizitën e suksesshme në Kosovë të Administratores së USAID, Samantha Power, e cila bashkë me Kryeministrin Kurti dhe ministren Rizvanolli shpallën ankandin e parë për parkun me energji solare me kapacitet prej 100 MW. Në lidhje me këtë, këshilltari Chollet tha se ajo ishte ndarë me përshtypjet më të mira dhe e falënderoi kryeministrin për pritjen. Kryeministri u shpreh i nderuar dhe mirënjohës për vizitën e administratores Power dhe për mbështetjen e vazhdueshme të USAID-it dhe Shteteve të Bashkuara të Amerikës për Kosovën”, thuhet tutje në njoftim.
Një ditë më parë, të mërkurën, Chollet ka biseduar edhe me presidentin e Serbisë, Aleksandër Vuçiq.
Ai është cituar t’i ketë thënë Vuçiqit se është e nevojshme që të shmangen provokimet dhe konfliktet në mes të Kosovës dhe Serbisë.