Nga objekti i Kuvendit të Kosovës, ku dështoi seanca konstituive, kryetari i Lëvizjes Vetëvendosje Albin Kurti, u kthye sërish në objektin e Qeverisë.
Këtë Kurti e bëri pavarësisht se paraditen e së martës dha dorëheqje nga posti i kryeministrit, derisa ai nuk tregoi nëse detyrat ia ka bartur zëvendësit të tij, Besnik Bislimi.
Pas Kurtit në objektin e qeverisë hynë edhe ish-ministrja e Drejtësisë, Albulena Haxhiu e ish-ministri i Shëndetësisë, Arben Vitia. As këta nuk patën fjalë për media.
Kurti, në letrën e dorëheqjes drejtuar Glauk Konjufcës, të cilit i është referuar si Kryetar i Kuvendit, ka shkruar se po e njoftonte atë për dorëheqjen me qëllim që të betohej si deputet.
“Për qëllim betimin si deputet i Kuvendit të Republikës së Kosovës, të legjislaturës së nëntë, po e përcjell edhe zyrtarisht njoftimin tim për dorëheqje nga posti ekzekutiv, veçse efektiv që nga data e lartcekur sipas Kushtetutës dhe ligjeve në fuqi”, thuhet në letrën e Kurtit.
Pasi kjo letër u publikua, Faton Peci tregoi se ai si ministër i Bujqësisë, por edhe kolegët e tij nga kabineti qeveritar kanë dhënë dorëheqje nga pozitat e ministrave.
“Pavarësisht që kemi dhënë dorëheqje unë kthehem në zyrën ku e kam të ministrit, për shkak se largimi i kryeministri në detyrë nga zyra e kryeministrit, dhe largimi i ministrave nga zyrat e ministrive do të krijonte mundësi të një hendeku të madh”, ka thënë ish-ministri i Bujqësisë.
Por, letra e Kurtit është kontestuar nga Instituti i Kosovës për Drejtësi, i cili vlerëson se ajo nuk paraqet aktin e dorëheqjes.
Sipas IKD-së, interpretimi i Kurtit se Qeveria e tij ka statusin ekuivalent me Qeverinë në detyrë vlenë për Qeverinë si institucion dhe jo për të si kreu i saj.
Ky institut vlerëson se përmbajtja e njoftimit të Kurtit tregon synimin e tij që ai të vazhdojë ta udhëheqë Qeverinë në detyrë edhe duke qenë deputet.
“IKD thekson se letra e dorëheqjes duhet të jetë e qartë dhe mos të lejoj hapësira për interpretime. E njëjta letër nuk duhet t’i drejtohet ish-Kryetarit të Kuvendit, z. Glauk Konjufca. Aktualisht, deri në zgjedhjen e Kryetarit të ri të Kuvendit. Mbi këtë çështje, letra e dorëheqjes duhet drejtuar tek Kryesuesi i seancës konstituive, që sipas Rregullores së Kuvendit duhet të jetë deputeti më i vjetër, e që në këtë rast është z. Avni Dehari”, kanë thënë nga IKD.
Nga qeveria e Kosovës nuk kanë kthyer përgjigje nëse Kurti do të vazhdojë me punët e tij në Qeveri.
Derisa përgjigje nuk ofruan as nga Komisioni Qendror i Zgjedhjeve, nëse para certifikimit të rezultateve përfundimtare kanë pranuar njoftim të dorëheqjes nga Kurti dhe anëtarë të kabinetit të tij.