Kryeministri i Kosovës, Albin Kurti, ka thënë se më 24 tetor i ka dërguar vërejtjet dhe kritikat e tij emisarit të BE-së për dialogun Kosovë-Serbi, Miroslav Lajçak, në lidhje me draft-statutin e Asociacionit të propozuar nga BE-ja.
Ai ka thënë se nuk mund t’i bëjë publike këto vërejtje dhe kritika për shkak të konfidencialitetit, por thotë se drafti është më i avancuar dhe krejtësisht tjetër nga ai i marrëveshjeve më të hershme.
“Unë për hir të konfidencialitetit të draftit, nuk mund të flas për vërejtjet dhe kritikat e mia, i kam përcjellë Lajcakut përmes Bislimit më 24 tetor, dy ditë para se të takohemi në Bruksel. Është draft tjetër, pakrahasimisht më i avancuar, por nuk do të thotë që jemi të kënaqur plotësisht, andaj edhe unë i kam dërguar vërejtjet dhe kritikat e mia”, ka thënë Kurti.
Shefi i ekzekutivit sërish ka theksuar se draftin e Asociacionit e ka pranuar vetëm si pjesë të një pakete, duke kërkuar që Kosova të marrë statusin e vendit kandidat për në BE dhe të jetë pjesë e programit të Partneritetit për Paqe.