Kryeministri i Republikës së Kosovës, Albin Kurti, ka dënuar incidentin në Uzinën ushtarake në Gramsh.
Përgjatë mbrëmjes të së shtunës, dy ushtarë shqiptarë të cilët ishin caktuar në detyrë për ruajtjen e Uzinës së Përpunimit të Armëve në Gramsh, kanë mbetur të lënduar pas një përplasjeje fizike me dy shtetas rusë dhe një ukrainas, të dyshuar si agjentë.
Ushtarët shqiptarë kanë dëgjuar lëvizje të dyshimta te personat, të cilët kanë tentuar të hyjnë fshehurazi në Uzinë në Gramsh, dhe janë afruar për t’i larguar.
“U dëshirojmë shërim të shpejtë dy ushtarakëve shqiptarë të lënduar nga sulmi me sprej neoparalizues”, ka shkruar Qeveria e Republikës së Kosovës.
Gjersa kanë uruar që rrethanat e ngjarjes të zbardhen sa më shpejtë, Qeveria e Kosovës ka bërë të ditur se Ministria e Mbrojtjes së Kosovës është në kontakt me Ministrinë e Mbrojtjes së Republikës së Shqipërisë.