Kryeministri i Republikës së Kosovës ka falënderuar të gjithë deputetët e Kuvendit të Kosovës që kanë votuar për ratifikimin e grantit mbi 200 milionë eurosh të MCC-së për energji e zhvillim.
“I falënderoj të gjithë dhe secilin nga 89 deputetët që me votën e tyre PËR ratifikuan grantin mbi 200 milionësh të MCC-së për energji e zhvillim. Mbështetja unanime e legjislativit për Programin Kompakt konfirmon ndikimin universal të saj. Do të përfitojnë të gjithë qytetarët e Republikës,” Ka shkruar Kurti.
Sipas Kurtit, nuk ka pozitë e as opozitë për progresin e Kosovës dhe ndihmën e Shteteve të Bashkuara.
“Nuk ka pozitë e opozitë për progresin e Kosovës dhe ndihmën e ShBA-së. Ende pa u bërë 2/3 e një dite të vetme pas nënshkrimit të marrëveshjes në Washington DC, Kuvendi i Kosovës i kaloi 2/3 e deputetëve duke e ratifikuar atë sot.”
Kryeministri Kurti është shprehur se nëpërmjet këtij granti po trasohet rruga për një të ardhme energjetike të qëndrueshme të sigurtë dhe të pastër.
“Një investim gjigant që do të sjellë investime të reja,” shkruan Kurti.