Kryeministri i Kosovës, Albin Kurti, ka biseduar me emisarin special të Britanisë për Ballkanin Perëndimor, Stuart Peach, rreth situatës në veri.
Nëpërmjet një postimi në rrjetin social, Twiiter, Kurti ka thënë se “në demokraci nuk ka vend për dhunë fashiste”.
Ai i ka vlerësuar “të egra” sulmet e protestuesve serbë ndaj Policisë, KFOR-it dhe gazetarëve.
“Qytetarët e të gjitha etnive kanë të drejtë për shërbim të plotë dhe të papenguar nga zyrtarët e tyre të zgjedhur”, ka shkruar ai në Twitter.
Po ashtu, kryeministri Kurti në një bisedë të dytë telefonike me ministrin e Jashtëm të Italisë, Antonio Tajani, ka diskutuar për situatën aktuale në veri të Kosovës.
Ai e ka falënderuar atë për siç i ka quajtur veprimet e guximshme të ushtarëve italianë të KFOR-it, për ta siguruar paqen në veri.
Kurti u ka uruar shërim të shpejtë ushtarëve të lënduar.
Ndryshe, rreth 25 ushtarë të KFOR-it janë lënduar si pasojë e sulmeve nga grupet kriminale në veri të vendit.
Vlen të theksohet se trupat e KFOR-it për asnjë moment nuk i kanë provokuar apo nuk kanë shfaqur dhunë te protestuesit.
Serbët në veri po i kundërshtojnë kryetarët e sapozgjedhur në tri komunat e veriut.