Kryeministri i Kosovës, Albin Kurti, të dielën e 25 shtatorit ka votuar për zgjedhjet e brendshme të Lëzizjes Vetëvendosje, i cili në të njëjtën kohë, është edhe kandidati i vetëm për kryetar të kësaj partie.
Pasi ka votuar, Kurti është deklaruar para gazetarëve për grevën që po vazhdon të mbahet nga SBAShK-u.
Ai ka thënë fjalë të ashpra për sindikalistët, të cilët i ka quajtur “sindikalistë të PAN-it”, koalicioni PDK-AAK-Nisma, i cili ishte drejtuar nga Ramush Haradinaj.
“Bëhet fjalë për një inati ndaj qeverisë. Sindikalistëve të PAN-it iu ka këputur sahati më 14 shkurt. Është keq se sa shumë po humbim”, ishin fjalët e Kurtit, njofton EO.
Përkundër faktit që ende nuk ka ndonjë marrëveshje në lidhje me grevën mes Qeverisë së Kosovës dhe SBAShK-ut, kryeministri Kurti shpreson se mësimi do të fillojë nesër.
“Është dashur të fillojë më 1 shtator (mësimi). Jam i bindur se nxënësit dhe prindërit duan të nisë mësimi dhe mësimdhënësi duan të japin mësim. Nuk duam të bojkotohet shteti pasi shkolla është shteti”, ka shtuar ai.
Ndryshe, Lëvizja Vetëvendosje të dielën e 25 shtatorit po mban zgjedhjet e brendshme të kësaj partie.