Kryeministri i Kosovës, Albin Kurti, gjatë seancës të së enjtes në Kuvendin e Kosovës është pyetur nga deputetja e Partisë Demokratike të Kosovës (PDK), Ariana Musliu-Shoshi për zgjedhjet në veri dhe se si parashihet të shkojë mbarëvajtja e tyre.
Kryeministri Kurti ka thënë se institucionet e Kosovës janë duke bërë maksimumin sa i përket përmbushjes të të gjitha obligimeve në lidhje me kërkesat që dalin nga procesi zgjedhor dhe se janë duke u bërë të gjitha përgatitjet e nevojshme.
“Sigurisht që ne bëjmë maksimumin sa i përket të gjitha obligimeve institucionale, në bazë të organeve shtetërore jemi duke ofruar të gjitha kushtet dhe masat që të bëhet mbarëvajtja e këtij procesi”, ka thënë Kurti.
Por, sipas tij, situata e sigurisë nuk është e njëjtë sikurse në një komunë me shumicë shqiptare, pasi, siç është shprehur ai, aty ka ende të instaluara “struktura ilegale të cilat janë trashëgimi e Millosheviqit”.
“Jemi duke i bërë të gjitha përgatitjet e nevojshme. Ne po i bëjmë përgatitjet me çfarë po mundemi, por a është situata sikurse në komunë me shumicë shqiptare, normalisht që ka dallim, obstruksionet e Serbisë atje janë të mëdha, mbetjet e strukturave ilegale janë trashëgimi e Millosheviqit, ose nuk u integruan asnjëherë më 2013, ose u integruan rrejshëm e u dorëhoqën në nëntor”, ka vijuar Kurti.
Ai u ka bërë thirrje të gjithë qytetarëve në katër komunat veriore që të dalin në zgjedhje dhe të votojnë për kandidatët e preferuar dhe se, sipas tij, nëse pengohet pluralizmi politik dhe e drejta themelore për të votuar lirshëm, do të presë përgjigjen nga institucionet me forcë të ligjit.
“Qeveria e Kosovës konform obligimeve ka marrë veprimet e duhura në mbështetje të KQZ-së, kemi vënë në funksion mekanizmat e duhur. Aktualisht ministritë e linjës janë në komunikim për të përmbushur kërkesat që dalin nga ky proces, janë ndarë mjetet e nevojshme buxhetore në ofrimin e kushteve të nevojshme të sigurisë për mbarëvajtjen e këtyre zgjedhjeve”.
Ndryshe, 23 prilli është caktuar si datë për mbajtjen e zgjedhjeve të jashtëzakonshme në katër komunat veriore.