Kryeministri i Kosovës, Albin Kurti, ka thënë se fushata drejtuar qytetarëve serbë të Kosovës nga Beogradi, ishte e egër dhe dezinformuese.
Sipas tij, kjo ishte edhe arsyeja e shtyrjes së implementimit të vendimit për reciprocitet të taragave dhe dokumenteve me Serbinë.
“Ne jemi shumë efikas në këtë aspekt dhe për shkak të fushatës së madhe të dezinformimit që është bërë nga Beogradi mbi qytetarët serbë të Kosovës, ne kemi pranuar te faktorët ndërkombëtarë që ta shtyjmë zbatimin deri më 1 shtator. Ne nuk besojmë që nuk kemi bërë fushatë të mjaftueshme ose të mirë. Ka qenë shumë e egër fushata e dezinformimit. Ne me punë, durim e angazhim gjithçka do ta përmbyllim mirë”, ka thënë Kurti.
Kreu i qeverisë ka theksuar se ajo që është dashur të ndodhë para 11 vjetëve, po fillon të zbatohet tani.
“11 vjet ka pasur pritje dhe tash për më pak se një muaj ka nxitim, ky muaj qenka shumë më i rëndë sësa ato 11 vjet”.
“Më 29 qershor të këtij viti Qeveria ka marrë 2 vendime, me të cilat ne themi qartë se do të fillojë shndërrimi i tabelave ilegale për automjetet nga koha e Millosheviqit, në targa të Republikës së Kosovës dhe kemi dhënë muajt gusht dhe shtator si afat për këtë gjë në mënyrë që më 1 tetor të mos kemi më automjete me ato targa”, ka thënë Kurti.
Përveç kësaj, Kurti ka përmendur edhe vendimin që thotë se duhet të ketë një dokument për të gjithë qytetarët me dokumenetet të identifikimit të lëshuara nga Serbia që kur të hyjnë në Kosovë me atë dokument të mund të identifikohen karshi autoritetve kosovare.
“Me datën 1 gusht, kemi lëshuar 2 mijë e 679 dokumente të tilla mesatarisht për 20 sekonda, kurse kur shkojnë në Serbi shkon prej 10 minuta e deri më shumë se një orë e shpeshherë jo vetëm për ta dekurajuar qytetarin qe të kthehet, por në fakt pët t’iu marrë para që ta kalojë kufirin”.
Kurti nuk i mohoi tensionimet të cilat mund të ndodhin edhe në të ardhmen.
“Mund të ketë tensionime edhe në të ardhmen, por ne jemi të vendosur në këtë që bëjmë, në njërën anë me respektimin e Kushtetutshmërisë dhe në anën tjetër me sa më shumë komunikim e bashkëpunim me faktorët ndërkombëtarë”.
Ai beson që në rrethanat që është Kosova, është marrë vendimi i duhur.