Kryeministri i Kosovës, Albin Kurti, në trevjetorin e qeverisjes, ka thënë se është krenar dhe ballëhapur për rezultatet e qeverisë së tij.
Teksa ka shpalosur punën trevjeçare të tij si kryeministër, Kurti ka thënë se ka pasur punësim të të rinjve e formalizim të ekonomisë.
Kurti ka deklaruar se falë mbështetjes së masave të ndërmarra nga qeveria, është dyfishuar numri i të rinjve të punësuar.
“Po i mbushim tre vjet qeverisje dhe kemi shënuar rezultate për të cilat jemi krenarë dhe ballëhapur. Punësimi është më i lartë seç ka qenë ndonjëherë, kemi dyfish më shumë të rinj të punësuar në treg të punës, mbi 30 mijë gra më shumë kanë vende pune përmes masave dhe mbështetjes sonë direkte. Në këtë mes ka edhe formalizma të punësimit, por formalizmi i ekonomisë është përpjekje vazhdueshme e qeverive dhe kur ai ndodh është po ashtu sukses i Qeverisë” ka deklaruar Kurti.
Kurti ka thënë se në qeverisjen e tij ka më shumë sundim të ligjit e korrupsioni po luftohet, por sipas tij, eliminimi i tij varet nga gjykatat e prokuroria.