Kryeministri i Kosovës, Albin Kurti ka reaguar pas aplikimit zyrtar të Kosovës në Këshillin e Evropës (KE), aplikim ky që është dorëzuar të enjten nga ministrja e Punëve të Jashtme dhe Diasporës, Donika Gërvalla-Schwarz.
Shefi i ekzekutivit, Kurti përmes një postimi në Facebook, ka thënë se në mbledhjen e së enjtes në Qeverinë e Kosovës është miratuar nisma për anëtarësimin e Kosovës në organizata ndërkombëtare.
“Në mbledhjen e sotme të Qeverisë miratuam nismën për anëtarësimin e Republikës sonë në këtë organizatë të rëndësishme ndërkombëtare, ndërkaq pak kohë më pas dorëzuam edhe aplikimin për anëtarësim”, ka thënë ai.
Sipas Kurtit, Kosova është vendi më demokratik në Ballkanin Perëndimor, ku të drejtat dhe liritë e njeriut janë të garantuara me Kushtetutë dhe ligj.
“Liria e shprehjes dhe medies çdo herë e më shumë po shënon përmirësim. Luftimi i korrupsionit është i pakompromis. Reforma në sundimin e ligjit prioritet”, ka shkruar Kurti.
Kurti, ndër të tjera ka shtuar se anëtarësimi në Këshillin e Evropës është vlerë e shtuar për Këshillin dhe mundësi për Kosovën që të përparojë edhe më shumë në fushën e të drejtave të njeriut, demokracisë dhe sundimit të ligjit.