Kryeministri i Republikës së Kosovës, Albin Kurti ishte i ftuar ditën e martë si mysafir në serinë e diskutimeve të organizuara në Universitetin Cambridge.
Kurti është shprehur se Kosova është histori e dyfishtë suksesi, së pari, histori suksesi e ndërhyrjes së NATO-s, qëndresës dhe luftës çlirimtare të popullit, dhe së dyti ka theksuar indikatorët pozitivë ekonomikë, “jemi duke lulëzuar ekonomikisht”, tha kryeministri Kurti.
Ai ka veçuar edhe renditjen e Kosovës në vendin e parë, sa i përket sundimit të ligjit në Ballkan.
Duke theksuar edhe rëndësinë e imazhit të vendit, Kurti ka thënë se imazhi i Kosovës është duke u përmirësuar dhe arsyeja kryesore për këtë është ndryshimi i madh demokratik që ka ndodhur vitin e kaluar gjatë muajit shkurt.
“Demokracia është brendi më i mirë”, ka thënë Kurti.
“Kosova, është vendi më pro përendimor dhe më demoktratik nga gjashtë shtetet e Ballkanit Perëndimor” ka shtuar ai.
Duke diskutuar për procesin e dialogut mes Republikës së Kosovës dhe Serbisë, kryeministri ka theksuar se marrëveshja do të ketë në qendër njohjen e ndërsjellë, siç është formalizuar edhe në letrat publike të Presidentit Biden dhe Sekretarit Blinken, dërguar Presidentes Osmani dhe Kryeministrit Kurti.
Kurti, gjithashtu, ka përmendur edhe angazhimin e Qeverisë për drejtësi, punësim, përkushtim, për arsim dhe aftësim profesional, digjitalizim, mbyllje të hendekut perëndimor, si dhe përfshirje dhe pjesëmarrje të plotë të të gjithë qytetarëve nga të gjitha komunitetet.
Kryeministri ka folur edhe për aplikimin e bërë për anëtarësimin në Këshillin e Evropës, dhe synimet e Republikës së Kosovës për t’u anëtarësuar në Bashkimin Evropian dhe për t’u bërë pjesë e Programit Partneriteti për Paqe të NATO-s, derisa të bëhet anëtare e plotë e NATO-s.