Kryeministri në detyrë, Albin Kurti, ka vlerësuar marrëdhëniet mes Kosovës dhe Shteteve të Bashkuara të Amerikës si të pazëvendësueshme, duke theksuar mirënjohjen e përhershme të popullit të Kosovës për mbështetjen amerikane në rrugën drejt lirisë dhe pavarësisë.
Pas pjesëmarrjes në pritjen e organizuar nga Ambasada e SHBA-së në Prishtinë, me rastin e 250-vjetorit të pavarësisë së Shteteve të Bashkuara të martën mbrëma, Kurti ka theksuar se vlerat mbi të cilat është themeluar Amerika – jeta, liria dhe kërkimi i lumturisë – kanë shërbyer si frymëzim për botën demokratike.
“Jeta, Liria dhe Kërkimi i Lumturisë, janë të veçuara në preambulën e Deklaratës së Pavarësisë së Shteteve të Bashkuara të Amerikës, në mesin e të drejtave të patjetërsueshme, si themel i qeverisjes që krijohet me miratimin e popullit,” ka shkruar Kurti.
Ai theksoi se këto vlera kanë frymëzuar botën e civilizuar, ndërsa për popullin e Kosovës, rruga drejt lirisë ka qenë e lidhur ngushtë me Shtetet e Bashkuara.
“Derisa bota e civilizuar është frymëzuar nga këto vlera, populli ynë për kohë shumë të gjatë ka qenë i privuar nga këto të drejta. E në këtë mes, përjetimi ynë është unik sepse për ne jetësimi i këtyre vlerave dhe të drejtave është i lidhur ngushtë me ShBA-të,” ka shtuar ai.
Kurti ka shprehur mirënjohje për ndihmën amerikane, duke theksuar partneritetin e ngushtë mes dy vendeve.
“Mbrëmë isha i nderuar të marrë pjesë në shënimin e Ditës së Pavarësisë së ShBA-ve në ambasadën amerikane në kryeqytetin e Republikës sonë. Kosova është përherë falënderuese e mirënjohëse ndaj ShBA-ve për ndihmën, partneritetin dhe aleancën e pazëvendësueshme,” ka përfunduar Kurti.