Kryeministri i Kosovës, Albin Kurti, ka shënuar Ditën e Flamurit dhe Pavarësisë së Shqipërisë me një urim të veçantë, duke njoftuar progresin në projektin e Kompleksit Memorial “Adem Jashari” në Prekaz.
Në një postim në Facebook, Kurti ka theksuar rëndësinë e këtij vendi të shenjtë për ruajtjen e kujtesës historike të heroizmit të Familjes Jashari, duke e cilësuar atë si simbol të çmimit të lirisë që populli i Kosovës e gëzon sot.
“Nuk do të kursejmë asgjë për të ndërtuar një kompleks memorial të rëndësishëm ndërkombëtarisht, i cili do të pasqyrojë dinjitetshëm dhe me një nivel të lartë artistik qëndresën dhe luftën e popullit për liri, pavarësi dhe bashkim, ashtu siç e meriton figura e Adem Jasharit dhe e Familjes Jashari”, ka shkruar Kurti.
Ai e përmbylli mesazhin e tij me urimin: “Gëzuar 28 Nëntori!”