Kryeministri i Kosovës, Albin Kurti, ka ripërsëritur deklaratën e tij se një nga arsyet e bllokimit të rrugëve të dielën e 31 korrikut, ishte keqinformimi apo “fake-news”.
Ai me anë të një postimi në llogarinë e tij në Twitter, ka shkruar se lajmet e rreme, veçanërisht në lidhje me vendimet për reciprocitet për targa dhe dokumente me Serbinë, kanë ndikuar në vendosjen e barrikadave në Veri të Kosovës.
“Në mbledhjen e djeshme të kabinetit kam vënë në dukje rreziqet e lajmeve të rreme, veçanërisht në lidhje me vendimet tona për targat e makinave dhe dokumentet hyrëse-dalëse në pikat kufitare me Serbisë”, shkroi Kurti, teksa shtoi se “ky dezinformim çoi në barrikada dhe shkelje të lëvizjes së lirë në Veri”.
At yesterday's cabinet meeting, I noted the dangers of fake news, particularly regarding our decisions on car plates & entry-exit docs at border crossing points w/ Serbia. This disinformation led to barricades & violation of free movement in the north of🇽🇰.https://t.co/8g8jnDHoa7
— Albin Kurti (@albinkurti) August 11, 2022
Ndryshe, të mërkurën e 10 gushtit, Kurti, në fillim të mbledhjes së Qeverisë së Kosovës ka folur për reciprocitetin e targave dhe dokumenteve me Serbinë.
Ai ka thënë se konvertimi i targave të automjeteve nga ato ilegale në RKS i shërben rendit dhe ligjit, sigurisë publike dhe lëvizjes së lirë në gjithë Republikën.
Po ashtu, kreu i qeverisë ka theksuar se vendimi për pajisje për dokumente për hyrje-dalje në pikat kufitare për ata që prezentojnë dokumentete e lëshuara nga Serbia, nuk do ta pengojë lirinë e lëvizjes.
“Për një masë të njëjtë, për tash e 11 vjet, sa herë që ne udhëtojmë në Serbi duhet të presim mes 10 deri në 60 minuta”, ka thënë ai, teksa shtoi se “barrikadat që rëndom vendosen në Veri, nuk vijnë nga poshtë por vendosen nga lart. Ato nuk i përfaqësojnë qytetarët tonë e as i mbrojnë”.
“Kam dëgjuar për lajmin e rremë se ID ose dokumentet serbe do të konfiskohen në kufi në këmbim të dokumenteve për hyrje-dalje. Kjo nuk është e vërtetë”, ka thënë Kurti.
Sipas tij, dokumenti për hyrje-dalje është dokument shtesë që jepet pa pagesë.
Ai ka bërë thirrje që të përcillen njoftimet nga qeveria dhe të verifikohen burimet e lajmeve, në mënyrë që të anashkalohet dezinformimi.
“Sot dezinformimi paraqet rrrezik për sigurinë kombëtare. Ju bëj thirrje që të përcillni njoftimet nga qeveria jonë, që të verifikoni burimet e lajmeve”.