Kryeministri i Kosovës, Albin Kurti, në seancën e 7 tetorit në Kuvendin e Kosovës ka thënë se ligji i pagave i ka përfunduar konsultimet publike dhe se hollësitë procedurale për të janë duke u trajtuar para se të vijnë në Qeveri dhe në Kuvend.
“Profesionistët shëndetësorë e kanë atë që e meritojnë maksimalisht në rrethanat dhe mundësitë ekzistuese. Përpos pagës dhe shtesave standarde në ligjin për zyrtarë publikë, ata që punojnë në sektorin publik do të kenë shtesa të veçanta”, ka thënë Kurti kur ka folur për benefitet e këtij ligji.
Kurti ka thënë se ky ligj nuk është sjellë në pranverë sepse është dashur të përgatitej mirë dhe në mënyrë të sofistikuar pasi Kosova e ka për herë të parë këtë ligj.
“Sa u përket profesionistëve të huaj, sidomos atyre nga mërgata, ne u bëjmë thirrje edhe njëherë që të inkuadrohen në sistemin tonë shëndetësor, ashtu që ta rrisim cilësinë dhe të plotësojmë zbrazëtirat që i kemi dhe gjithashtu edhe kontributin e tyre i cili është më shumë spontan, ta bëjmë institucional”, ka vijuar Kurti.
Ndërsa për ata që po e lënë vendin, Kurti ka thënë se nuk i mohon largimet, por edhe nuk janë ashtu siç po i fryjnë.
“Ne natyrisht që punojmë e angazhohemi që të mos shkojnë punëtorët nga shërbimi shëndetësor publik i Kosovës, disa shkojnë jashtë vendit, por nuk po shkojnë ashtu siç thuhet”.
Kurti i ka bërë thirrje mërgatës që t’ bashkohet stafit shëndetësor në Kosovë në mënyrë që të forcohet sistemi shëndetësor.