Kryeministri i Kosovës, Albin Kurti, ka theksuar para përfaqësuesve të përhershëm të QUINT-it në OSBE dhe ambasadorit britanik në Kosovë se propozimi evropian është platformë solide për të ecur para në dialogun me Serbinë.
Kurti të martën e 7 shkurtit është takuar me ambasadorët e QUINT-it në OSBE, Michael Carpenter, përfaqësuesi i Përhershëm i ShBA-së, Christine Fages, përfaqësuese e Përhershme e Francës, Gesa Braeutigam, përfaqësuese e Përhershme e Gjermanisë, Stefano Baldi, përfaqësuesi i Përhershëm i Italisë dhe Neil Bush, përfaqësuesi i Përhershëm i Britanisë së madhe, si dhe Nocholas Abbottin, ambasadorin britanik në Prishtinë, ku kanë diskutuar për shumë çështje.
“Në takim u diskutua edhe për marrëdhëniet ndërmjet Kosovës dhe Serbisë dhe për propozimin evropian, për të cilin Kryeministri Kurti tha se është i pranueshëm si bazë e mirë për diskutime të mëtutjeshme dhe platformë solide për të ecur përpara. Diskutuan për bashkëpunimin ndërmjet Republikës së Kosovës dhe shteteve të QUINT-it në kuadër të fushëveprimit të OSBE-së dhe se si ky bashkëpunim mund të thellohet gjatë gjysmës së dytë të mandatit qeverisës. Kryeministri shprehu mirënjohjen e tij për rolin dhe kontributin e OSBE-së dhe mbështetjen e vazhdueshme që i kanë dhënë institucioneve të Republikës”, thuhet në njoftimin e Kryeministrisë.
Ndër të tjera, në njoftim, thuhet se Kurti i ka njoftuar ambasadorët me zhvillimet e fundit në vend, punët dhe të arriturat e qeverisë në fushën e sundimit të ligjit, atë ekonomike e demokratike. Ndërsa, theksohet se ambasadorët i kanë vlerësuar ndryshimet pozitive në vend dhe përkushtimin e qeverisë .
Madje, ata edhe e kanë konfirmuar mbështetjen e vendeve të tyre ndaj Kosovës.
“Ambasadorët vlerësuan ndryshimet pozitive në vend dhe përkushtimin e Qeverisë për reforma. Në të njëjtën kohë, konfirmuan mbështetjen e vendeve të tyre ndaj Kosovës”, theksohet në njoftimin e Kryeministrisë së Kosovës.
“Ai i njoftoi ambasadorët me zhvillimet e fundit në vend dhe për punën dhe të arriturat e qeverisë në fushën e sundimit të ligjit, për reformat e ndërmarra, progresin ekonomik e demokratik që janë evidentuar edhe në raportet ndërkombëtare përfshirë këtu edhe atë të Bashkimit Evropian”.