Kryeministri i Albin Kurti ka vizituar Agjencinë e Kosovës për Inteligjencë (AKI), ku është pritur nga drejtori Petrit Ajeti, stafi drejtues dhe zyrtarë të tjerë të institucionit.
Vizita u zhvillua me rastin e 18-vjetorit të Pavarësisë së Republikës së Kosovës dhe 17-vjetorit të themelimit të AKI-së. Me këtë rast u ndanë certifikata për zyrtarët e rinj dhe u përurua një objekt modern brenda kompleksit të AKI-së.
Në fjalën e tij, Kryeministri theksoi se inteligjenca mbetet një nga hallkat më të rëndësishme në mbrojtjen e sovranitetit të vendit, duke garantuar që Republika të jetë e përgatitur për çdo sfidë dhe të marrë vendime të informuara.
Ai nënvizoi se, në kuadër të prioriteteve për mbështetjen e sektorit të sigurisë, AKI ka gëzuar mbështetje të vazhdueshme nga Qeveria e Republikës së Kosovës, përfshirë rritje të konsiderueshme të buxhetit, dhe se kjo mbështetje do të vijojë edhe në të ardhmen.
Kryeministri vlerësoi avancimin e vazhdueshëm të kapaciteteve teknologjike, analitike dhe operative të AKI-së, duke theksuar përshtatjen me realitetin e ri të sigurisë dhe forcimin e bashkëpunimit me institucionet vendore dhe partnerët ndërkombëtarë.
Sipas tij, sukseset e AKI-së në vitet e fundit kanë kontribuar në forcimin e sigurisë kombëtare dhe rajonale, në bashkëpunim të ngushtë me institucionet vendore dhe shërbimet partnere. Ai përmendi trajtimin profesional të kërcënimeve nga spiunazhi, kërcënimet hibride dhe kibernetike, ekstremizmi, radikalizmi dhe krimi i organizuar.
Në përfundim, Kryeministri shprehu mirënjohje dhe respekt për stafin drejtues dhe të gjithë zyrtarët e AKI-së, duke theksuar se ata shërbejnë me përkushtim dhe atdhedashuri në një profesion që është mision, shpesh në heshtje, por gjithmonë në mbrojtje të Republikës dhe qytetarëve të saj.