Kryeministri i Kosovës, Albin Kurti, së bashku me ministren e Ekonomisë, Artane Rizvanolli, kanë pritur në takim Bordin e Drejtorëve të KEK-ut, kryesuar nga Skender Haziri.

Në këtë takim ishte i pranishëm edhe Kryeshefi Ekzekutiv i KEK-ut, Nagip Krasniqi.

Siç njofton Zyra e Kryeministrit, rëndësia e punës së KEK-ut, veçanërisht, gjatë krizës energjetike dhe sfidat që kjo ndërmarrje ballafaqohet, ishin dy prej temave të këtij takimi.

“Infrastruktura dhe teknologjia e vjetër e termocentraleve, vazhdojnë të mbeten sfidat kryesore”, thuhet në njoftim.

Përkundër kësaj, Bordi i Drejtorëve e njoftoi kryeministrin Kurti rreth masave dhe përgatitjeve që KEK-u ka bërë për periudhën e dimrit.

Shefi i ekzekutivit e falënderoi Bordin për punën e deritanishme.

Ai tha se ky dimër përballë krizës globale energjetike, do të varet shumë nga optimizimi i kapaciteteve prodhuese të energjisë elektrike të vendit dhe racionalizimi i shpenzimit të energjisë elektrike nga ana e institucioneve publike, qytetarëve dhe bizneseve.

Sipas Kurtit, duhen të dyja, që ky dimër të tejkalohet më lehtë.