Kryeministri i Kosovës, Albin Kurti, bashkë me ministrin e Mbrojtjes, Armend Mehaj si dhe ministrin e Administrimit të Pushtetit Lokal, Elbert Krasniqi, kanë dalë në terren për t’i parë nga afër dëmet e shkaktuara nga vërshimet e fundit në disa komuna të Kosovës.
Kurti tha se i kanë vizituar zonat e prekura nga vërshimet, ku edhe janë njoftuar për dëmet që i kanë shkaktuar ato.
Kryeministri i Kosovës foli edhe për shkaqet, të cilat, sipas tij, i kanë sjellë këto vërshime, duke i përmendur dëmtimet e brigjeve dhe të shtretërve të lumenjve nga eksploatimi i shtretërve të lumenjve.
“Dëmtimi i brigjeve dhe shtretërve të lumenjve nga eksploatimi i egër i zhavorrit, prerja ilegale e pyjeve ndër vite dhe mungesa e projekteve të pyllëzimit, sistemet jo adekuate të kanalizimit dhe ujëmbledhjes, si dhe ndryshimet klimatike globale i kanë lehtësuar, shpejtuar e shpeshtuar përmbytjet e vendbanimeve nga vërshimet”, ka thënë ai.
Qeveria e Kosovës dhe të gjitha institucionet shtetërore, sipas Kurtit, po qëndrojnë pranë banorëve të komunave ku pati vërshime duke i ndihmuar e mbështetur ata.