Kryeministri i Kosovës, Albin Kurti ka reaguar pas aksidentit tragjik të së shtunës, ku humbën jetën tre të rinj në Liqenin e Badocit.
Në një postim në Facebook, Kurti shprehu ngushëllimet e tij familjeve të viktimave, duke theksuar rëndësinë e kujdesit gjatë ngasjes dhe respektimit të rregullave të trafikut.
“Vdekje tragjike e tre të rinjve mbrëmë rreth mesnatës. Ngushëllime të sinqerta familjeve, shokëve dhe shoqeve të tyre. Në këtë kohë të rëndë ndajmë dhimbjen dhe pikëllimin me ta”, ka shkruar Kurti, duke u bërë thirrje qytetarëve që të jenë më të kujdesshëm dhe të shmangin tejkalimin e shpejtësisë.
“I lus qytetarët që të kenë kujdes e t’i respektojnë rregullat e komunikacionit si dhe të dekurajojnë të gjithë ata që praktikojnë tejkalimin e shpejtësisë së lejuar apo afirmojnë vozitjen tepër të shpejtë”, ka shkruar Kurti në Facebook.
Për vdekjen e tre personave kanë reaguar edhe zyrtarë të tjerë shtetërorë.