Kryeministri i Kosovës, Albin Kurti gjatë fjalës së tij në Forumin e Paqes në Paris teksa u pyet nëse Bashkimi Evropian mund ta ndihmojë Kosovën, tha se u beson dy zotimeve që kanë ardhur nga atje.
“Kemi dy premtime, një prej Von der Leyen për planin e zgjerimit, por kemi edhe një premtim nga Charles Michell se 2030 është viti kur BE-ja dhe Ballkani Perëndimor bëhen bashkë. Kemi kohë dhe kemi substancë dhe duhet ta shfrytëzojmë këtë që të hyjmë në rrugën që është e pakthyeshme. Jo të gjitha shtetet kanë të njëjtin pasion dhe dëshirë për anëtarësim në BE”, ka thënë Kurti.
Shefi i ekzekutivit ka thënë se vitin e ardhshëm Kosova do të fillojë të punojë për marrjen e statusit të vendit kandidat për anëtarësim në Bashkimin Evropian.
“Jam takuar me Von Der Leyen dy herë. Një herë në Athinë, pastaj në Prishtinë. Shpresoj shumë që të kemi një pjesë të madhe të planit të rritjes. Më 15 dhjetor e dorëzova aplikimin për anëtarësim e Kosovës në BE dhe kam kërkuar nga Von Der Leyen që të ma dërgojnë pyetësorin, pyetjeve të cilave me durim do t’u përgjigjemi. Varet nga ajo dhe nga Këshilli i BE-së që ne të marrim statusin e kandidatit si të fundit në Ballkan. Pasi të hiqet regjimi i vizave për Kosovën, shpresoj që në vitin e ardhshëm do të fillojmë dhe të punojmë që ta marrim statusin e vendit kandidat”, ka vijuar ai.