Pas fitores së Kombëtares së Kosovës ndaj Lituanisë me rezultat 1:0 në stadiumin “Fadil Vokrri”, kryeministri Albin Kurti ka shprehur krenarinë për performancën e dardanëve.
Në një postim në Facebook, ai ka theksuar rëndësinë e fitores dhe frymën luftarake të ekipit.
“Mbrëmë mjaftoi goli i hershëm për të fituar ndeshjen. Djemtë tanë e përmbyllen këtë cikël me fitore, ndërsa na presin mundësi të tjera për t’u promovuar tutje. Na kanë kënaqur me lojën e bukur, e krenar me qëndrimin e pathyer. Suksese tutje!”, ka shkruar Kurti.
Kjo fitore e vendos Kosovën në vendin e dytë në grup me 12 pikë, ndërkohë që ende nuk është regjistruar rezultati i ndeshjes së ndërprerë me Rumaninë.
Rumania kryeson grupin me 15 pikë.