Kryeministri i Kosovës, Albin Kurti, ka deklaruar se projekti i hekurudhës Durrës-Prishtinë është ndër projektet më të mëdha dhe më të rëndësishme.
Me anë të një postimi në llogarinë e tij në Facebook, teksa ka shkruar për mbledhjen e tetë të përbashkët midis Qeverisë së Shqipërisë dhe asaj të Kosovës, i pari i qeverisë ka thënë se duke qëndruar të përbashkuar, ruhen dhe avancohen marrëdhëniet midis dy vendeve.
“Projekti i hekurudhës Durrës-Prishtinë është ndër projektet më të mëdha e më të rëndësishme. Kjo hekurudhë do t’i bashkojë edhe më fort ekonomitë tona dhe do ta rrisë lëvizshmërinë dhe lidhshmërinë ndërmjet republikave tona”, ka shkruar Kurti.
Siç vlerëson kryeministri Kurti, as sa bashkon historia, gjuha dhe kombi, aq edhe duhet që dy shtetet shqiptare t’i lidhë bashkëpunimi institucional në çdo fushë.
“Bashkëpunim ky që lehtëson dhe përmirëson jetën e qytetarëve tanë dhe që rritë besimin social ndërmjet qytetarëve në të dy anët e kufirit”, ka shtuar Kurti.
“Me këtë qëllim, në mbledhjen e sotme nënshkruam marrëveshje ndërqeveritare për arsim, drejtësi, mbrojtje, shëndetësi, energji, bujqësi, dogana, sigurime shoqërore, turizëm, rini, gjendje civile, lëvizje të lirë, transport e infrastrukturë rrugore”, ka shkruar ai.
Pas takimit të tetë të përbashkët të Qeverisë së Kosovës dhe asaj të Shqipërisë, janë nënshkruar 19 marrëveshje.