Kryeministri i Kosovës, Albin Kurti, e ka konfirmuar lirimin e tre policëve kosovarë, Rifat Zeka, Beqir Sefi dhe Shem Mustafa, të cilët ishin kidnapuar nga forcat serbe më 14 qershor.

Kurti ka shprehur gëzimin për kthimin e policëve në familjet e tyre, por gjithashtu ka theksuar se rrëmbimi i tyre është një shkelje e rëndë e të drejtave të njeriut dhe Serbia duhet të qortohet

“Konfirmojmë se 3 policët e rrëmbyer janë liruar. Edhe pse jemi të gëzuar që ata kthehen në familjet e tyre, ky rrëmbim konsiston në një shkelje të rëndë të të drejtave të njeriut dhe duhet qortuar. Agresioni serb duhet të mbajë përgjegjësi”, ka shkruar ai në rrjetin social Twitter.

Tre policët e Kosovës, Rifat Zeka, Beqir Sefi dhe Shem Mustafa, janë liruar këtë të hënë pas seancës gjyqësore në gjykatën e Kralevës në Serbi.

Policët ishin patrullues kufitarë dhe kryenin detyrën e tyre në një pikë statike në territorin e Kosovës, për të parandaluar kalimin e grupeve kriminale dhe kontrabandën, duke përfshirë dyshime për armatim në atë zonë.

Lexo edhe: Policia e Kosovës publikon hartën e pozicionimit të policëve që u rrëmbyen nga Serbia

Shtetet e Bashkuara, Gjermania dhe Mbretëria e Bashkuar i kanë bërë thirrje vazhdimisht  Serbisë që t’i lirojë pa kushte policët.