Kryeministri i Kosovës, Albin Kurti, në një intervistë të dhënë për televizionin lokal të Tetovës, “TV Koha”, ka thënë se nuk e di se kur do të hiqen masat e përkohshme të BE-së ndaj Kosovës.
“Nuk e di se kur do të hiqen masat, besoj se duhet të hiqen sa më parë për shkak se Kosova është konstruktive, Qeveria e Kosovës ka qenë kreative me ide dhe të përkushtuar në dialog, i cili ka rezultuar me marrëveshjen bazike”, ka thënë Kurti.
Kurti ka thënë se nuk është “e logjikshme” të insistohet kundër Kosovës.
“Besoj që nuk është e logjikshme e as racionale të insistohet kundër Kosovës me masa nga më të ndryshme, prej atyre financiare deri tek vizitat e nivelit të lartë. Ato do të duhej të tejkaloheshin, do të duhej të hiqeshin. Dhe kjo letra e mbi 50 parlamentarëve të Perëndimit demokratik, ShBA-së, Bashkimit Evropian, Mbretërisë së Bashkuar besoj është hapi i duhur në drejtimin e duhur që të përmirësohet qasja ndaj Kosovës e të ashpërsohet ndaj Serbisë agresore, e cila nuk distancohet as nga Millosheviqi e as nga Putini”, ka shtuar Kurti.
Gjatë ditës së djeshme (e premte), kryeministri i Kosovës, Albin Kurti, ka marrë pjesë në përurimin e një rruge në komunën e Çairit në Maqedoninë e Veriut, e cila do ta mbajë emrin e “Mandelës së Ballkanit”, Adem Demaçit.
Lexo dhe: Kurti e përuron rrugën me emrin ”Adem Demaçi” në komunën e Çairit në Maqedoninë e Veriut
“Rrugëve të Kosovës që mbajnë emrin “Adem Demaçi”, iu shtua sot edhe një rrugë në komunën e Çairit në Maqedoni të Veriut”, ka shkruar dje Kurti.