Kryeministri i Kosovës, Albin Kurti, e ka përkujtuar Betejën e Morinës, ku 25 vjet më parë, ranë heroikisht nëntë ushtarë të UÇK-së, të cilët po luftonin kundër forcave pushtuese serbe.
Kurti tha se nëpër Morinë ishte krijuar një korridor për furnizim me armë nga Shqipëria në Kosovë.
“Ajo ishte një betejë shumë e ashpër që ndodhi plot 25 vite më parë, në një kohë aq të vështirë, në muajt e parë të luftës në Kosovë, kur mobilizimi, furnizimi dhe organizimi i Ushtrisë Çlirimtare të Kosovës ishte sfida kryesore e kohës. Në një kohë kur secili shteg mali dhe secila rrugë që mund të shërbente si kanal furnizimi me armë për UÇK-në, ishte jetike për luftën çlirimtare të Kosovës”, tha ai.
“Një korridor i tillë nëpërmjet të cilit furnizohej me armë UÇK-ja, kalonte nëpër fshatin Morinë të Gjakovës, prej nga ushtarë çlirimtarë nga treva të ndryshme të Kosovës, fusnin armë nga Shqipëria në Kosovë”, ka vijuar ai.
Kurti tha se “Që nga 3 maji i vitit 1998 kur nisën luftimet në Ponoshec dhe 13 qershori kur forcat serbe ndërmorën një ofensivë të gjerë për ta marrë nën kontrollin e tyre Morinën, ushtarët e UÇK-së u shkaktuan humbje forcave të Serbisë në balance prej dhjetëra pjesëtarësh”.
Kryeministri i Kosovës i përmendi me emra dëshmorët e rënë në Betejën e Morinës: Muhamet Ukshini, Arben Ukshini, Blerim Ukshini, Shkelzen Syla, Sylejmon Abdyli, Fisnik Salihu, Ymer Bytyqi, Nezir Elezaj dhe Ahmet Pulatani.